|
25.05.2023
Вуйүә 18 - Хуэйзў йүян җечи. Йиче лохуэйжынму җы зу сы нян гощинди җейин тамудини. Чынщин доще ги чуанлян җыгә җечиди нүжын Фатима Закировна Сеитова – җёшу, йүнвынщүә фубәшы. Җыгә нүжын йищин-йиҗи зоди заёнди банфа зэ онлайн бу шә йиче винан гуәли жәно җечили. Зу да щиннян туршон гиди җихуа, фынфу, чито зэ хошо данлинди банфа чуанлянли җыгә җечили. Бу шә суй ваваму, дажынму ду гощинди дуанли заёнди зуәзоли: сый на зыҗиди чиннён йүян шәли сывынли, сый шәли кугәр дэ кулюрли, цэхуар дэ гўҗерли, сый дуанли шутин чүзыли дэ тёвули, сый дуанли җүнмый хуарҗонзыли, сый зыфәли лохуэйхуэйди хуәфон дэ чуандэли.
Хазахстан – җысы минзў дуәди гуйту, мый йигә минзў ю зыҗиди йүян дэ куйчынни, ю зыҗиди лисыни. Йинви җыгә, замуди гуйтуди линшу жынму зоди заёнди банфа каншу дэ фаҗон чиннён йүяндини. Мый йигә йүян до замуди шоннян гынчян зущён амади шынти, зущён чиннён гуйҗун мәмә.
Йиче минзўму йигә лян йигә ю лянщини дэ лэвонди сычиншон - ту йигә зусы щинэ, щищүә йүян. Йүян ба йиче минзўжынму лянлуәдини.
Чиннён йүян – до мый йигә жын гынчян зущён санниди чин фынфыр, зущён җүнмый чунтян, чёчёрди хуанлуә, зущён да шын лан җён, зущён тяншонди бый йүнцэ, зущён хулонлонди жәту…
Зэ җыгә җечишон Җунгуй дащүәди җёшы Ван Го Цзе, Юсуф Лю Баожун, Римма Рамазановна Масырова, Хусей Шимарович Дауров ду на жәщин гунщили хуэйзў минжынмули. Тамуди зэ зыҗиди богошон ду читоли ги фаҗон, щищүә дэ каншу чиннён йүян сычиншон лю дашын.
Зыху Мащин Замира Исмаиловна зэ зыҗиди видео ролик литу ба замуди вида сывынжын Ясыр Шывазыди зуәзо дуанли.
Даҗя ду җыдони, вуйүә шыбасы замуди вида сывынжын Ясыр Шывазыди сынжыр. Җыгә вида щеҗя ги хуэйзў вынщүә зали гынди хуэйзўжын.
Ясыр Шывазысы зэ Хырхыз Гунхуәгуй Александровка щёнҗуонни 1906 нянди вуйүә 18 сын-ёнхади. Вида зуәҗя ги хуэйзўжынди вынмин сынхуәшон вухади гўзы дадихын.
Ясыр Шывазы гуон бусы хуэйзўди, тасы Хырхыз Гунхәгуйди минжын сыҗя. Ба тади сывын на хуэйзў хуа, хырхыз хуа, ханхуа йинчўлэдини. Вида сыҗя гунзун щечўлэли сышыгә фу, таму литу ю заёнди зуәпинни, кәсы тади дуәйибанзы зуәзосы сывын.
Ясыр Шывазы зэ зыҗиди сывыншон чонли Хырхызстан дифонди җүнмый дэ гәҗя минжынди лисыли, чонли тэпин, щёнхо дэ щинэ Зўгуйли. Тади зуәпинму җё йиче жын щинэ зыҗиди Зўгуйни, кунгў минжынди щёнхони, йиҗя тэнэ йиҗяни.
Замуди суй ваваму е фили да гункўли, таму ду гощинди на жәщин ги заму дуанли сывынли – җысы Давузова Руфина, Небезова Асия, Юнуза Карим Александровка щёнҗуон, Хырхызстан.
Ырдык Лян Конкино Иссык-Куль дичү, Хырхызстан – Кимузаев Икрам, Кимузаева Камилла.
Масанчи щёнҗуон, Хазахстан – Биянху Амира, Двумарова Латифа, Двумарова Фатима, Харова Алима. Алматы чынпу, Хазахстан – Двумарова Алия.
Ташкент чынпу, Узбекистан – Фонширова Айша, Фонширов Алишер, Дидиза Эмиль, Даров Тимур.
Чўгуә тин сывынму хан тинли ю миншынди чонҗязымуди шутин чүзыли – Рустам Арбуду, Сулейман Люшсан, Зухра Хихиза, Зульфия Мейзер, Санхурова Салима, Фатима Хонан, Мемезов Салим. Тамуди чүзы ги йиче жынму гиди да лилён.
Ги йиче шәли сывынди ваму дуанли лищинли – җысы йинчўлэди тёҗянхади сывын. Ба җыщезы сывын фанйи вурус йүяншонли. Чуанлян җыгә җечиди жынму на жәщин ги Маздин Закир Киргизбаевич доли щели. Та фанчон ги да бонцуди, йинви җыгә ги таму е дуанли йигә лищин.
Юсупов Хамид Умарович, Шиваза Зухра Джумановна, Фатима Нурахуновна Машинхаева, Замира Исмаиловна Мащин, Ибрагимова Халима Марсуевна, Лягазова Фатима Абдуллаевна, Мамиева Альмира Рамазановна, Юсупов Мухамед Умарович, Сардиева Шахноза Абдухамитовна, Денбо Джумабай Шамузович, Юнусова Медина Ибрагимовна, Махуаюн Разия ду дыйли гуйҗун лищинли.
Зу җы йитян «Ясыр Шывазы» җунщүәнниди ваму, щүәсынму, җёйүанму. нёнлозыму йизор ду шудо җищён гынчян җинян замуди вида сывынжынли. Бувәгуанди линшу жын ги ваму ба Ясыр Шывазыди зыҗуан, зуәзо, фубынзыму, шонхо дэ данлинди хошо дунщи зыфәли. Щүәсынму ги лэди кижынму дуанли Ясыр Шывазыди сывынмули, чонли чүзыли, дуанли тёвули.
Ё шәни, җыгә җечи гуәди жәно, ги даҗун жынму дуанли щинчин дэ да зывон дэ вонщёнли.
Ухуар Сыва
|
