ОФ "Международная Академия
Культурного и Экономического
Сотрудничества
"Новый Шелковый Путь"

МИНЖЫНДИ ДА ШОНШЫ

29.09.2021

 

Чютянди жызы  йидани  лян  Сортобе щёнҗуонниди  № 18 хо җунщүәди линшу жын Идрис Меваевич Бицаров зэмусы ги та бонмонди  жынму М. А. Айдарова, А.А. Ибраимов, А.Х.Дыва, И.Щ.Люшир, җёйүанму, щүәсынму йидани гощинди җейин  11 – хо  «А»  җёнтон литу нянди щүәсын  Шамиль Фушанлоли.  Җысыма, Шамиль чынха юминшынди жынли!

Җюйүә 22  ги  18 җунщүәди гунзуә жынму, щүәсынму  чынха йибыйзы вонбулёди жызыли. Зошыни, щүәтонниди ваму, нади заён янсыйди данзы, җүнмый хуар дэ лан чи җейинли  Шамиль Фушанлоли. Да вамуди куни гуон тинҗя «Хоханзы!», «Замуди Шоншы!», «Зу җымуҗя вончян зу!»  Йичеди чёнбошон тади Шамильди  йинтў дэ дыйхади шонхому.

Щүәҗон Бицаров И.М. зэ зыҗиди җёнян литу ба  Шамильди  йиман  шонхо, пинпинму, бёфәли. Щинэди җёйүанму лян пын-юму ги Шамиль  дуанли гуйҗун лищинли.  

Даҗун ду җыдони,   2021 нян  җюйүә 16-19 Будапешт  чынпуни гуәли кикбоксингди пинпинили. Зу зэ җыгә пинпиншон Шамиль ба дин годи «Шыҗиди җён» шонхо  дыйшонли. Ё шәни, тади җёлянйүан Исмар Люшанло ба йичеди лилён, җянчё дэ гункў,  ги зыҗиди щүәсынму дуангили.

Шамильди җыгә чынгунсы лян  йиче щинэ йүндун жынмуди йидани дыйшонли. Ги ниму, чынщин доще! Минжынди кугәр шәди дуйдурди «Даҗя шы цэ, хуәян го!»

Җящя – җы зусы йиче ганбанди тур. Зу зэ җящянни ваму ба нёнлозыму шәхади щинҗи хуа, ганбан, тёён йибыйзы  ду вонбулё.   Тади нёнлозы Харби Фушанло  лян  Зарина Тащирова тёёнли 6 ваваму. Дин дуәдисы Шакир, Шамильсы ди эргә, Салим ди сангә, Омар ди сыгә, ди вугәсы Азиз, ди люгә вавасы   суй нүр  Латифа.  Җы вугә гәгә ба суй мыймый  Латифа  тэ щихандихын, тэ щинэдихын. Ё шәни, таму гогощинщинди гуә жызыдини. Йигә ги йигә ги бонцудини, шә щинҗи хуадини. Йидани щехуандини, йидани  зу хуәдини, дый җышыдини. Җы зусы фучин дэ мучинди  дин дади йүнчи. Җё җымугә йүнчи фанчон ги җящяму ги куанда  лўдо, җё нёнлозыму фи гункў, җё мыйи йигә җящя зэ фаҗон, каншу дэ бохў сычиншон  лю да шын!

Ухуар Сыва