ОФ "Международная Академия
Культурного и Экономического
Сотрудничества
"Новый Шелковый Путь"

Мый ийгә жын ю зыҗиди щинэди йинсынни – У каждого человека есть любимая профессия

30.10.2020

Җыгә щёнҗуон шызэ хокан. Куанда лў,  лёнхани  лю фу, чүниди чин фи, гәҗяниди дамын гынчян заёнди җүнмый хуар. Заёнди пузы, җунҗянниди Вынхуа да җян, ги шонли Вида Зўгуй җонди  жынму щюгэхади җищён, чинщянди бинйүан, щёнҗуонниди да фуфон, җүнмыйди  сыгә щүәтонму, шызэ хоканди сангә вавайүанзыму, мощёр шыдигә да сы, тян чиюди фонзы дэ чыхуә гуанзы…

Чўгуә шәхади  җыщезы, җыгә щёнҗуонни хан ю йигә чигуэ сычинни. Шыба нян туни, 2002 няншон, шыйийүә чў 7,  Парса Щимарди җящяни сын - ёнли сангә фонсыр нүр. Җысы Рахиля, Шахия лян Сания.  Лян  җыгә җящяди жынму йигә щёнҗуонни йидани гощин зали. Кәсы җуа дэ тёён сангә фонсыр гуон тамуди нёнлозыму дэ  җящяди жынму җыдони.

Канҗян фонсырму жынму бу ю  гәҗя зу чинжәди щикан тамули. Дуәйибанзы фонсырму лян җинзы (җир - зеркало) йиён, билүн: йигәди  янзы  зэ юбонгә нянҗин дихани, ди эргәди зэ зуә бонгә нянҗин дихани, йигәсы на ю шу зу сани, ди эргә на зуә шу зу сани. Таму хан нын  йиҗя ба йиҗяди сыщён (мысль) дэ вонщён (желание) нын  цэҗуә (угадывать). Таму да суйсур йигә бу ли йигә, фанчон зэ йиданини. Йигә зэ бу щинхали ди эргә е зу юцухали.  Нёнлозыму ба таму  ду  йиён тынгўдини. Суйди сыхур нёнлозыму цощинди ги таму чуан йиёнди сансар, кўкўр, мэ йиёнди момор, мотизы, хэхәр, кәсы да шы суй вонгуә, таму  зыҗи җян дэ чуан данлинди йишонни. Дуәйибанзы фонсырму чуанди йиён йифуму.

Таму зу чуанди йиёнди йишонму еба, кәсы таму зыҗи бы гәҗяди йишон нын жындый – замуҗя нын жындый? Лян зыҗиди видо…

Да сын-ёнха  далин вэ жынму ба таму тэ нан фынщё, кәсы мучин ба таму ду фынщё ходихын.  Хан ю хошо чёчи сычинни - йиданни шон җунщүә, җян йигә йинсын, ганбан, зушу, йидани чўҗя зэмусы җехун…

Чуан шыҗешон ю хошо щинэди йинсынни (профессия), шуйини.  Җысы – дэфу, җёйүан, зу мэмэ жын, чонҗязы, йинйүәҗя (музыкант),  хуаҗён, кэ чичәди жын, җуонҗяхан, кэ пузыди жын, фон сылинди жын,  цэфын, теҗён, щюгэҗя (строитель), җун хуарди йинсын ( цветоводство) зэ далинди.  Мый ийгә жын ю зыҗиди щинэ ганбани. Ба җыгә щинэди ганбан таму гощинди, цощинди  каншудини  зэмусы фубонди җё фаҗонни.

Җысыма,  сыҗе фиди тэ куэдихын, мә җуәчуә, таму сангә ба Сортобе щёнҗуонниди № 18 җунщүә  на хазах йүян нянванли.  Җян щинэди йинсын сыхур е доли. Шахия лян Сания вудо Беткайнарди щёщүә литули. Җянхади йинсысы – цэфын.  Рахиля вудо Кордайди Гуманитарный Экономический колледж литули.  Тади дин дади  вонщёнсы чынха  Йингуй йүянди җёйүанни.

Мый йигә жын зэ шыҗешон зо зыҗиди лўдони. Зу җыгә лўдо  ба та зу линдо зыҗиди  вонщён гынчянли. Ги юди жынму җыгә лўдо ю гуон, ю пинфә кәсы  ги юди жынму җыгә лўдо тэ винандихын. Жынму зу зоди заёнди банфа ба җыгә винан зу мангуәли.

Жын ло -  җи бый ду җыдони,  мәю җышы,  е зу мәю лилёнли.  Вужин  -  дый җышы до суй – да  жынму гынчянсы  дин дадигә  вонщён. Кәсы,  дый җышыди җыгә лўдо тэ нандихын, зэ  җыгә лўшон ё фи да щинҗин дэ гункўни, ба йиче җин заншон, ташыди  зысы  вончян ё зуни.  Дый җышы  - шыҗешон  зэ мәю җинҗондади лилён. Ю җышыди жын,  фанчон зэ са сычиншон,   туни зудини, таму ги  фаҗон дэ каншу щинэ Зўгуйди сычиншон фанчон  сыму заёнди тёҗян дэ вонщённи!

Зу җочў җыщезы вонщён таму сангә Рахиля, Шахия лян Сания зы вончян шыкандини.

Ухуар Сыва.