|
20.09.2022
Җюйүә чȳ 9 – җысы йиче чиеҗямуди (предприниматель) җечи. Ба җыгә җечи замуди гуйту туфын-тусы җейиндини.
Җыгә йинсынди җечи җыншы ги заму зыфә - сынйи (бизнес) – гуйтуди дин җȳн-ё зушу.
Мощёр 30 нян дȳлиди сыхуршон, сынйи ги заму дуан го сынҗи (экономика) зэмусы ги замуди сынхуә гиди да бонцу.
Йинви җыгә, гуйту ба та ёҗинди зуәйүн (роль) лян фаҗон йиҗян, зы вон гони тидини.
Чиеҗяму. Ба сый нын җё чиеҗя? Чиеҗя – җысы шончянди (активный) зэмусы фачиди (инициативный) жын. Таму зоди дин ходи зэмусы заёнди фонфа ги жынму дуан зыҗиди бынсы, данзы дэ нынгу. Дон чиеҗя бусы йүнйиди. Тамуди гункȳ тэ җундихын. Кәсы мә канн җыщезы винан, таму, вончян зудини.
Җыгә җечиди йисы тэ шындихын: ту йигә зусы ги таму, чиеҗяму, чынщин доще, мә хэпа винан ба йиче лилён заншон зысы вончян шыканди зули, ги дуәшо жынму гиди бонцу зэмусы ба гунзуә вифын ги мәю ган сади жынму, ду дуангили.
Линйирди җы эр нян литу до чиеҗяму бусы йүнйиди. Дэдȳ бин ба йигә шыҗе ду юҗуанли, до нагә йинсынди жынму гынчян ду ю винанли.
Мә кан җыщезы винан, чиеҗяму ба зыҗиди йинсын мә лёде. Тамусы җыншыди Йүнщүн – ги тамуди гункȳ ё дуан җыншыди җынчынни (признание).
Ба чиеҗямуди гунло данлинди гуйни е җейиндини - Җунгуй, Хырхызстан, Белорусия, Армения, Азербайджан, Украина зэ хошо данлинди.
Зу җы йитян гуә дахуэй дэ зэ йүан җуәзы гынчян йү мяндини зэмусы зы заёнди шанланхуэй (выставка) дэ бәланхуэй (ярмарка), дуан заёнди шонходини.
Шыҗешон ю хошо щинчон ходи жынмуни, таму фанчон ги жынму ги да фубондини. Чынщин доще ги ниму, чиеҗяму! Ниди йиче бонцу до даҗун гынчян йигә гуйҗун лищин! Ба җыщезы хочȳ замуди чиннянму йибыйзы вонбулё!
|
