|
27.09.2022
 
Җящя – җысы мыйи йигә жынди дин гуйҗунди бобый. Зу зэ җящяни заму щищүә щинэ нёнлозыму, тэнэ зэмусы цощин дин линҗинди жынму, фужо вичүму. Винанди сыхур йигә ги йигә шә җи җү хо хуа, бонмон, фубон. Щинэ ниди чин жынму лян ни йидани гощинни зэмусы пәфанни. Ба таму ги ни чынхади жә шущин фанчон ни нын җуәлэ! Ниму зу җыхали: шыҗешон ни бусы йигәр.
Кәсы мый йигә жын ю зыҗиди канфани (понятие). Ги дуә йибанзы жынму җысы щинэди линҗинди жынму фанчон зэ гынчянни - дада, мама, нана, баба, җеҗему, гәгәму, мыймыйму, щүндиму. Таму зу йигә җингуан зэмусы цощин йигәрни.
Җящя – җы зусы йиче ганбанди тур. Зу зэ җящянни ваму ба нёнлозыму шәхади щинҗи хуа, ганбан, тёён йибыйзы вонбулё. Таму щинэди җящя ю зыҗиди куйчынни – җысы зэ җуәзы гынчян хә ца зэмусы чинжәди ламә, гунщи сынжыр, дадю вонжынму, йиданни щехуан зэмусы та тўён, йидани гощин дэ пәфан, йигә ги йигә ги бонцу, йигә фубон йигә. Нёнлозыму фиди да гункў тёён дэ лянлуә зыҗиди вамули. Мыйи йигә жын зу тади нёнлозымуди җуәзун зу гуәли гуонйинли. Винанди сыхур таму зу доли нёнлозыму гынчянли …
Җы җи җү хуа фанчон ги заму, шыҗешонди даҗун жынму, ги лилёндини:
Җящя – җысы Заму, Җящя - җысы Ӊә, Җящя – җысы дада лян мама, Җящя – җысы да җечи, Җящя – җысы да йүнчи, Җящя – җысы куан да фонзы, Җящя – җыгә дифоншон гуон каншу ходи сычинму, бу җи юцу дэ пәфан! Җящя – җысы хуанлуә щёшын!
Зу йинви җыщезы хочў заму щинэ Хазахстан няннян җюйүәни ди эргә йичи зу җейин җыгә - Җящя җечини. Чынщин доще ги Гуйҗяди линшу жынму, таму фанчон цощинди, зоди заёнди банфа җё мый йиҗязыди сынхуә зы вон вонни фаҗон зэмусы чынха ю да йүнчиди җящяни. Йинви җящя – җысы гуйтуди ту йигә щехуэй зэмусы каншу минжынди куйчын дэ лийи, цощинди ги хубый ба гуйҗунди лисы йилюханни.
Хазахстан – җысы ю да нынгуди гуйту. Тади лисы тэ чондихын зэмусы ю фугуй куйчын дэ лийини. Зу да тади димяршон гуәли Вида Чузыди лўдоли.
Щүандинди Хазахстансы – Дўли гуйту, лян вындинди җинҗи (стабильная экономика) зэмусы җёнлэди җихуа (планы на будущее).
Минзўди Щёнхосы - замуди да җинҗон. Җыгә җинҗон ги жынму гиди да бонцу җё таму щинэ зэмусы вуданщүан (безопасность) Зўгуй, фаҗон минзўди Щёнхо.
Замуди щинэ Хазахстан мый йигә минзў ю нынгу фаҗон зыҗиди йүян, куйчын дэ лийи. Заму йидани зусы - Хазахстанди минжын!
Тэпин лян тунйи (согласие) до мый йигә жын гынчянсы дин ёҗинди. Йинви җыгә йиче минзў щинфу җёнлэди гуонйинни. Җы зусы замуди гуйҗун Хазахстан: ю тэпинди, ю щёнходи, ю фуҗүди, ю зыюди (свободный), ю минзў дуәди зэмусы ги каншу Җящяди гуйту.
Чуан шыҗешон ю хошо щинэди йинсынни (профессия), шуйини. Җысы – дэфу, җёйүан, фищинйүан (летчик), зу мэмэ жын, чонҗязы, йинйүәҗя (музыкант), хуаҗён, кэ чичәди жын, җуонҗяхан, кэ пузыди жын, фон сылинди жын, цэфын, теҗён, щюгэҗя (строитель), фагуан (судья), минҗин (милиционер), җун хуарди йинсын ( цветоводство) зэ далинди. Мый ийгә жын ю зыҗиди щинэ ганбани. Ба җыгә щинэди ганбан таму гощинди, цощинди каншудини зэмусы фубонди җё фаҗонни. Зу җочў җыщезы хочў ю хошо ю минди җящяни: юди җящяди жынму тади нёнлозымуди җуәзун дусы дэфуму, җёйүанму, җуонҗяханму, чонҗязыму, хуаҗязыму, мэмэжынму, кэ чичәди зэ хошоди данлинди. Зу ган са йинсы еба, таму лян җящяди жынму шонлёнди ганни.
Зу ба гуйҗунди җящя жынму на минйү, бобый дэ миншын ду бу хуан. Йинви җыгә фонгў, щёщин зэмусы кангў зыҗиди Җящя!
Ухуар Сыва
|
