|
08.07.2022
Гощин сычин. Вуҗин зэ Москва чынниди чȳбаншәни кә ба фубынзы «Хуэйзȳ минжынди хуәфон » йинчȳлэли йигә гуә. Кәсы йинчȳлэди фур тэ шодихын.
Җыгә фубынзы литу ба хуәфониди зу вуку чыди фонзы, фонфа ду юни. Ду җыдони, йигә шыҗешонди жынму ду щинэ замуди хуәфонзыни.
Гуон лүмян ю җи ёнзыди зушу лȳфуни. Ю литу цохади, лүмян тэ щёндихын. Чȳгуә лүмян хан ю бозы, җёзы, ба та хан җёди бяншы, кохади бозы, хуэйхади йү, җȳхади, ю литу җянхади ню жу, ён жу, җи жу, заёнди цэ – лазы цэ, җёнду цэ, чезы цэ, цохади могȳ цэ, фынтёзы, дахади фын, хуэйхади җидан… Канҗян, тинҗян җыщезы вуку щён чыди нянҗин ду хуали, ту ду йүнкэли…
Йинви җыгә вончȳ йин фубынзы – җысы дин ёҗинди йигә сычин.
Ги йинчȳлэди фубынзыди жын Мухамед Мадиван чынщин доще!
Ду щинфуни, җы бусы ниди, гуйҗунди Мухамед Мадиван, линйирди фубынзы! Дё җыгә даҗунди вонщён дэ зывон чынзуәлё!
|
