|
08.03.2023
Шыҗешон хын дуә гуйтуму ду җейин санйүә чў 8 - Йиче Фунүжынмуди җечидини. Замуди щинэ Хазахстан җы йитян ду щехуандини. Найигә гунчони, җящяни, щүәтонни, бинйүанни, вава фонзыни – ду җейин җыгә щинэ җечидини. Ду җыдони, җечиди лисы замугә…
Зу җы йитян мый йигә да жын, суй вава, шоннянму ду ги дин щинэди, дин гуйҗунди, ги дин мяншанди, ги дин хоканди, дин йүнчи дади нүжын дуан җүнмый хуар лян шә щинҗиди хуани.
Ама, мама, мучин – шыҗешон до мый йигә жын гынчян җысы дин гуйҗунди жын! Зу җы йи җү хуа «Мама» туфын-тусы зу да суй ваваму куни нын тинлэ. Ба мамади щинэ до зыҗиди ваму гынчян шә йибыйзы ду шә бу ван. Ба тади щёляр, жә шущин лян линдор йиёнди шынйин тянтяр вумый ганзо зэ канҗя зэмусы тинҗя, щинни бу ю зыҗиди зущён хўтёр йиён зы вон гони, гони фиди, щүанди шонли тянли…
Мама - лян җүнмый щятянди зохуа йиён, кэфанди җүнмый хуар йиён ю җонди җүн, видо ю цуан, заёнди янсый ю дуә. Зусы Мама ба зохуади йиче фугуй ги заму зу дуангили! Зу лян мама йидани ӊә зущён гўҗер литуди гунҗў (принцесса) зэмусы чинвон (принц) йиён зэ җүнмый фулинни лондини, җю хуардини, лян чон чүзы дэ тёдини!
Ги дуәйибанзы жынму Мама – зу лян гуй йүә йиён, йинви заму зэ бущинхали та ги да бонцуни, ги да лилённи! Щинни тэ гощинди сыхур, були тэ пәфанди сыхур, заму зу зо щинэди, жынщин дади, цощинди зэмусы бу фа юцуди Мама гынчянли. Таму зу шә дуәшо щинҗиди хуа, юсы чуанфә, юсы лян заму йиданни гощин дэ пәфан. Мама банди заёнди банфа, ба кўди вава җё гощинни!
Мучин – җысы Йинщүн! Ниму ду җыдома, виса тасы Йинщүн? Йинви таму ба зыҗиди нянлуй дэ тындун җё зыҗиди ваму бу җян! Зу тэ винанди сыхур, дин пәфанди сыхур, Мама фанчон пый щёлярдини, тади җыгә щёляр, зулян жәтуди гуонлён йиён, бу ли тади мяншан ляляр.
Мама – җысы дин ходи, чигуэди! Мама - җысы Зохуа, Гончён, Йүнчи, Щинэ, Тэпин, Хуаҗён, зэмусы фанчон каншуди, фубонди, чын жә шуди Нүжын! Мама – җысы Сынхуә, Гуонйин, Шуфу!
Щёнҗуонниди Нүжынму… Тасы хо җуонҗяхан, юсы кан җящяди йүнчи, юсы тёён вамуди нёнлозы, юсы ги зыҗиди ваму шон щүәди сыхур ги бонцу, юсы цэфын, юсы чўзы…
Щёнҗуонниди Нүжынму са сычиншон шу ду ё дони: ви җивар, гувар, җинщинди ги дуәжынму зу вуку чыди зэмусы ба гун ца сыхуршон шугуандо җуәзышон, щи йишон дэ хо цэфу, җейин кижынму зэмусы лон мынзы. Җы зусы тамуди да йүнчи. Чыщин доще ги вуло җуонҗяди жынму, ги тёён вамуди жынму, ги линшу жынму, ги кэ чичәди жынму, ги кэ пузыди жынму, ги сун щинди жынму, фон сынлинди жынму, ги җёйүанму, дэфуму, лин ёнлянди жынму, ги чиннянму дашын шә Ганще, Дуәще!
Нүжынмуди миншын зэ натарни? Зу зэ тади гункўшонни! Ба таму вончян шыканди Нүжынму няннян җы йитян ду гунщидини, шон шонходини, дуан линщиндини.
Ги ниму лин ёнлянди Нүжынму, гунзуәди Нүжынму, тёён вамуди Нүжынму панвон щинниди наннин, җящяди пиннан, тэпин, йүнчи дэ хуә бый суй. Җё ниди вонщён дэ зывон фанчон суй ни, фугуй дэ гончён бә ли ни! Нисы замуди да шоншы! Җё чиннян фанчон та ниди җуәзун зу.
Вида щеҗяму, сыжынму, зуәчүҗяму, чонҗяму зэ зыҗиди зуәпин литу ба Мучинмуди, Нүжынмуди гункў щели, чонли зэмусы куаҗёнли. Шыҗешонди нагә йинсын ду ю бынзы дади, данзы дади, шыщин - шыйиди Нүжынмуни, Мучинмуни! Ги ниму, Мучинму, Нүжынму чынщин доще!
Зу җүмый чунтянди җы йитян замуди линшу жынму зоди заёнди банфа җейин тадини. Дуан хуар, фа щи, чон чүзы зэмусы дуан хоканди тёву, шә сывын зэ хошо данлинди.
Ухуар Сыва
|
