ОФ "Международная Академия
Культурного и Экономического
Сотрудничества
"Новый Шелковый Путь"

Җюйүә чў 1 долэли - Җышы җечи. Ваму ду шонщүәчили, даҗя гунщи!

01.09.2020

Җысыма, мә җуәчуә  щятянди сангә йүә зущён хўтёр вон лан тяншон вон го фишон зули.

Җүнмый, фуҗү чютян долэли! Зу лян та йитун  Җюйүә чў 1 – Дый Җышыди җечи е зу долэли.

Җюйүә чў 1 – җысы йиче җёүанму лян щүәсынмуди да җечи. До таму гынчян җысы щин сынхуә, щин гуонйин, щин  шуфу. Зу йинви җыгә тайүарниди  йиче зохуа лян жынму ю  гощин, ю шоншы.  До щүәсынму гынчян җысы фубынзыди щён видо,  җысы щин йишонди җүнмый янсый дэ ёнфа, җысы щин пибо дэ заёнди янсыйди гэран. Зу җы йитян заёнди йүанданзы, хуарму ба  щүәтонму  дабади шызэ хокан. Зу да лойүанни ба шутин чүзымуди  йин  дэ щүәҗонди җён ян зу нын тинҗян.

Хонзыни зущён  лян майи по луанди йиёнди щүәсынму, гощинди вон щинэ щүәтони зудини. Шон тухо җёнтонниди суй ваму шуни нади хуарму, щинни хэпадини, кәсы гощинди зу доли щүәтонниди чён гынзы гынчян вон тайүардини. Таму хан бу җыдо, щүәтон зу чынха тади ди эргә җящяли, җёйүанму зу чынха тамуди ди эргә нёнлозымули, йидани шонщүәди ваму чынха җи пын - юли.  Нүзымуди  тушон лян  быйбутёзы бонхади хуар, эрвазыму чуанди бый хансанзы, бәлонни лыйди  линдэ дэ җуәшон чуанди химир хэ…

До җёйүанму гынчян җы йитян е чынха вонбулёди. Йинви таму зу лян йиче шон щүәди ваму жыншыни. Таму җыдони – ба суйщинщирди ваму ё вон җын лўшон линни, лян  замуди тэпин димяр зэмусы щин сынхуә лян жыншы зэмусы  зы вончян лян щищүә дэ каншуди  ё бохўни. 

Кәсы җиннян  2020 нян,  Җюйүә чў 1, Дый җышыди җечишон  ба җыщезы гощин  йиман жынму, бу шә да суй, ло-шо ду  мәдый  дыйшон….

Йинви фонгў зэмусы каншу даҗунди гончён заму  щинэ Хазахстан зэмусы лян йигә шыҗе ба җы йитян нёнлозыму, җёйүанму, щүәсынму зэ зыҗиди җящяни җейинли. 

Щүәтонниди щүәҗонму, җёйүанму, нёнлозыму сыму заёнди банфа, ба щинэ җечи җейинли. Билүн: Сортобе щёнҗуонни  №18 җунщүә  щүәтонни  гунзуәди нүжынму М. А. Айдарова лян А.Х. Дыва золи йигә фонзы,  ги щүәсынму лян нёнлозыму дуан йигә хо лищин. Таму лёнгә зуәди чичә зэ ман хонзы зуди  на хазах лян вурус йүян бёфәди гунщили  даҗунли.

Хонзыниди ваму шуни нади  җүнмый хуар, заёнди йүанданзы, суй данчин чи җейин тамули. Ё шәни,  таму зохади җыгә  фонзы до йиче ваму, нёнлозыму гынчян тэ чигуэдихын…

Данлинди щүәтонни җёйүанму, щүәсынму зэ видео ролик литу йигә ба йигә гунщили: сый чонли шутин чүзыли, сый дуанли сывынли, сый җёнли янли, сый хуали хуарҗонзыли…

Мә кан җыщезы винан  ба җыгә җечи гого - щищинди җейинли…

Ги йиче щүәсынму, нёнлозыму, җёйүанму  чито җё җы йинян пиннан вусы гуәлё, зэ дый җышыди сычиншон ду фи да гункў! Йигә ба йигә фубон дэ тэнэ!

Ваму фанчон җё гощин, дашын җё щё! Танщин нянфу, дый җышы, хунхуә, жәно!

Ухуар Сыва